立法會選舉今日投票，新界西候選人陳偉業（大舊）尋日喺社交網站上載一張有三位加拿大美少女嘅全身照，中間嗰位更係佢喺加拿大讀書嘅寶貝二女Vanessa。Vanessa留言話，佢同一班朋友自幼喺香港成長，雖然今日身處異鄉，但佢哋深信香港應該擁有一個充滿希望、民主自由及尊重人權嘅將來，所以一齊着住大舊嘅助選團戰衣，呼籲選民投票畀人民力量各區候選人。
大舊好開心話，Vanessa依家喺溫哥華嘅大學讀緊會計二年級，佢只係間唔中同個女講吓啲選舉嘢，但估唔到囡囡會記得咁清楚喎。大舊仲話，對有咁多美少女幫佢遙距打氣感到非常鼓舞，大讚囡囡有創意之餘，又令佢老懷安慰。