「飲香港水」大嘅貪曾，自今年七月一日下台後，好似人間蒸發咁，都唔知雲遊咗去邊？經本報「探射燈」一照，原來貪曾唔係扮大俠「蕭然一劍走天涯」，卻原來係有家歸不得！
諗起那十箱印上「香港回歸10年紀念珍藏」嘅貴州茅台，最近又升值咗啦，如今當「雜物」咁擺放在前特首辦，認真暴殄天物，希望「三不」密令，立會選舉投票日後，可以鬼鬼祟祟飛返來歎一杯強國貪官至愛嘅名酒！說不定趕上中秋佳節，屆時舉頭望明月，縱然「一輪千古廣寒深，折盡桂花應白髮」，猶幸起舞弄清影，知道自己尚在人間，畢竟「歎盡省港澳，貪盡海陸空」，亦不枉此生矣！
貪曾縮骨治港，在任七年劣迹斑斑，尤其以權謀私，官商勾結，彰彰明甚，荷蘭水蓋當糖果派，慰勞一眾富貴朋友，講起都令人火滾及不齒！
貪曾做咗七年特首，最大成就竟然係贏得「香港第一貪官」，把香港廉潔形象毀於一旦，呢啲惡行係港人最不能放低、求求其其算數的。
寫《人性的弱點》嘅卡耐基話：心愛的東西不見了，可以再去買一個；錢花完了，可以再賺回來。如果夢想丟失了，就難以再尋覓回來。夢想是激發人們改善命運的力量源泉，是完成崇高使命和創造偉大成就的動力。
香港要找回廉潔奉公的夢想和核心價值，這崇高使命就是要對貪曾追究到底，一句話：刑事調查最實際，下台也要為貪腐負責，絕不能「刑不上大夫」！廉署有冇真正行動，人在做，天在看！