政情：泛民「染紅」講一套做一套
泛民主派在明在暗力撐並要求政府撤回德育及國民教育科，聲稱反對洗腦「染紅」下一代，但暗地裏就講一套做一套，主動「染紅」登記做港區全國人大代表嘅選民，其中嘅佼佼者係人稱「李漢奸」嘅民主黨（白鴿黨）創黨主席李柱銘、主席何俊仁（鐵頭仁）及民協馮檢基（KK），就連絕食反國民教育嘅教協理事韓連山亦榜上有名。查實泛民表裏不一都並非首次，試問呢啲政客又點可以為民發聲，甚至取信於民呢？
三十六名港區人大代表嘅取態被視為中央對個別議題嘅「探熱針」，適逢人大換屆選舉今年底舉行，全國人大常委會辦公廳喺今年六月中向一千八百幾名合資格選舉會議成員發出通知，查詢係咪願意登記做人大選民。呢個登記過程喺七月上旬開始，歷時兩個星期，合資格嘅人士要主動登記做選民，最後合共有一千六百多人登記咗做選民，換言之有二百多人主動放棄選出港區人大嘅選民權利。
逾30人包括白鴿公文袋
不過，我哋翻查人大嘅選民名單有驚人發現，粗略估計最少有三十名極活躍喺政圈嘅泛民中人，已經靜靜雞「染紅」做咗人大選民，當中好多仲係反國民教育不遺餘力嘅泛民立法會候選人，最近屢次同人民力量就捐款問題互轟嘅白鴿黨，更加係甘願被「染紅」嘅大戶，該黨兩名超級區議會候選人鐵頭仁同涂謹申、香港島直選嘅單仲偕同楊森、九龍西嘅黃碧雲以及張文光、新界東嘅黃成智都榜上有名。
鐵頭仁胞弟都一齊染紅
至於成日將反對香港赤化放喺嘴邊嘅公民黨，新界西候選人余若薇及九龍東嘅梁家傑亦有份投票選人大；而不時批評對手係西環「欽點」嘅工程界黎廣德亦自打嘴巴做咗人大選民。另外，資訊科技界候選人莫乃光亦有登記。至於放棄連任立法會議員嘅亦大有人在，包括白鴿黨李華明、張文光，就連鐵頭仁個細佬何俊麒都染紅一家親。
話時話，做人大選民係要主動去登記，之前接二連三被踢爆漏報利益嘅鐵頭仁，睇怕都冇得再用「唔知情、唔記得」呢啲藉口做擋箭牌喇！今次泛民咁多人「斷正」，相信將來好難再站喺道德高地胡亂向政府發炮。工程界候選人仲有盧偉國、何鍾泰及陸宏廣。資訊科技界候選人仲有譚偉豪。九龍東候選名單仲有胡志偉、黃國健、陳鑑林、陶君行、黃洋達、謝偉俊、譚香文、嚴鳳至。