政情:《蘋果》屈李家仁教人碌蛋去瘀

從西醫角度嚟講,碌雞蛋去瘀係毫無科學根據嘅古老療法,正常醫生都唔會推薦病人咁做。不過,兒科醫生李家仁日前接受《蘋果日報》訪問時,只係從一般人角度去解釋點解有呢種療法,點知尋日《蘋果日報》就刊出一則「碌雞蛋合乎去瘀原則」嘅報道,下面仲刊登埋李家仁張相,搞到好似係李醫生支持同鼓勵人碌雞蛋去瘀咁。

李家仁尋日打開報紙後發現報道唔多妥,即刻用自己醫務所嘅信紙,連同有關報道放上微博同網頁澄清,強調自己「沒叫人用雞蛋去瘀」,重申雞蛋只可以用嚟食,用嚟去瘀係無補於事。李家仁接受我哋查詢時話,從西醫角度嚟講,只有藥膏先可以去瘀,只係《蘋果日報》記者問佢點睇呢個碌雞蛋療法,佢就從一般人角度嘗試去拆解呢個療法嘅原理,但當然唔等於支持碌雞蛋去瘀啦,唔明白個記者點解要咁報道喎。

第一手消息請下載on.cc東方互動iPhone/iPad/Android/Windows Phone Apps