東方掀動捐肝潮 瑪麗救人七連環

開講都有話，救人一命勝造七級浮屠，家陣換肝手術救七人，即係勝造四十九級浮屠，你都咪話香港人唔叻仔。之所以會有咁令人熱淚盈眶嘅港產傳奇，源於一位叫做陳旭娟嘅單親好媽媽。陳旭娟產後一個月急性乙型肝炎發作，唔換肝就冇命。東方報業集團獨家報道並且強烈呼籲好心人捐肝，得到非常熱烈嘅回應。徘徊鬼門關邊緣嘅陳旭娟終於接獲好消息，有一位剛剛離世嘅中年女士願意捐贈器官。八月五日陳旭娟接受屍肝移植手術成功延續寶貴性命，瑪麗醫院亦開始咗救人七連環嘅神聖任務。

即係咁，生命係絕對可以感動生命嘅，本報報道有人緊急求肝，觸發咗一次洶湧澎湃嘅捐肝潮，令到不少病人受惠。香港大學外科學系主任盧寵茂就話嘞，感謝本報落力呼籲，亦感激勇敢嘅求肝病人，畀市民感受背後嘅親情故事，有助推動器官捐贈，捐肝數字增加亦成為團隊奮鬥救人嘅原動力：「就算遇上各種異數，我哋都永不放棄！」

救人七連環嘅神聖任務由八月五日一直去到八月十三日，期間醫療人員差不多係不眠不休。講到呢度，功夫茶有必要向盧寵茂以及所有救人團隊嘅成員致敬，一切很美，只因有你！

東方掀動捐肝潮之後，其中一宗個案係咁嘅，八月八日屯門醫院有剛去世病人捐出肝臟，移植去四十四歲肝硬化男病人符先生身上。港大外科學系肝臟移植外科主任陳詩正形容，手術難度好高，因為病人同時有靜脈栓塞，加上血管非常薄，醫生必須膽大心細切除組織，否則會出血過多。好彩多得醫護人員合作無間，手術終於順利完成。

陳詩正話呀，傳媒報道求肝消息之後，屍肝移植嘅機會增加，主要由於患者背後故事觸動人心，而且成功移植個案增加市民對手術嘅信心，捐器官數字亦會提升。

所以話啫，傳媒為民喉舌真係好重要，不但作為第四權監察政府，而且隨時隨地發放正能量，觸發助人為快樂之本嘅高尚情操。好似膠粒污染呢一單環保災難咁吖，靠政府公布就嘥氣啦，只要有好心人向傳媒報料，然後廣泛報道災情，熱血港人就會自動自覺走去執膠，呢啲咪就係香港精神囉！

計功夫茶話齋，香港精神必須薪火相傳一路延續落去，有膠齊齊執，有人齊齊救。器官捐贈嘅優良概念一旦大大力宣揚開去，一二三四五六七，香港一定得得得！