政情：何鍾泰樁腳「跳船」撐盧偉國
立法會工程界今年陷入四人混戰局面，建制派候選人嘅助選團更出現「跳船潮」，歷屆曾協助現任工程界議員何鍾泰出選嘅梁廣灝今年轉投做「梁營」代表盧偉國（WK）競選經理，不過佢就否認自己倒戈，強調只係要「為業界做事」，又意有所指咁話做咩公務都有周期，夠鐘就要交棒，對何鍾泰唔肯交棒嘅不滿可謂呼之欲出。
而一直被視為何鍾泰「徒弟」、今次亦跳船幫WK助選嘅嚴建平就話，回歸以來都好支持何鍾泰，不過佢話何鍾泰去屆角逐連任時曾明言係「最後一擊」，所以今次再度出擊實有「誠信問題」喎！除咗有上述兩位仁兄一唱一和明諷暗寸何鍾泰唔肯退位外，WK尋日舉行誓師大會時仲邀請詹伯樂等多位工程師學會前會長站台支持。
齋睇尋日誓師大會嘅人馬，WK似乎已掌握一定票源，但唔知近日嘅僭建問題對佢選情有咩影響呢？呢位工程師尋日就話，佢屋企嘅玻璃棚因為種種客觀原因未有及時拆除，其中一個原因，係當時屋企有BB喎！工程界候選人仲有黎廣德同陸宏廣。