政情：葛珮帆騰雞 搵陳克勤過票
民建聯除咗喺新界西派三條候選隊伍出選之外，新界東亦派兩條隊出戰，所以投票嘅決定真係難倒啲支持者喇。該黨嘅新界東候選人葛珮帆透露，選情仍然非常險峻，所以真係要同黨友陳克勤傾吓畀啲票過嚟喎。葛珮帆咁樣開到聲，莫非選情真係危到要向陳克勤「乞票」？
根據民建聯嘅分票安排，克勤主要攞新東嘅北區同大埔嘅票，沙田、西貢同將軍澳就係葛珮帆嘅，可能離投票前三星期，分票機制仲未運作得好好。葛珮帆仲話，今屆立法會選舉特別難宣傳，因為淨係新界東就有十九條名單，搞到啲街坊都唔想再接單張，再加上好多人都唔明一人兩票點運作，所以佢惟有用網上宣傳去谷高人氣喎。
新界東嘅參選名單，仲有張超雄、田北俊、葉偉明、陳志全、劉慧卿、黃成智、蔡耀昌、范國威、湯家驊、梁國雄、龐愛蘭、邱榮光、何民傑、梁安琪、方國珊、陳國強、龐一鳴名單。