民主黨被踢爆收取肥佬黎巨額獻金，呢件事去到選舉論壇即成為大家攻擊民主黨嘅最佳材料。尋日九龍東選舉論壇上，民主黨胡志偉遭左中右黨派圍攻，人民力量黃洋達狠批白鴿黨「投共」。獨立嘅謝偉俊形容白鴿黨「投肥佬黎」，唔敢講收咗幾多錢。死穴被篤中，搞到胡志偉即刻無聲出。
建制派之間表面平靜，但其實係暗裏較勁。工聯會黃國健尋日搞造勢大會，已不點名指有建制派喺地區撬票，周圍造謠，話工聯會夠票，可以投畀其他人喎。人人係唔係都告急，黃國健當然澄清話自己仲未夠票，工聯會票一定唔可以轉投畀第二個喎。
尋日論壇上最幽默嘅一定係報稱學童輔導導師嘅嚴鳳至，支持度一直偏低嘅佢，講明不求勝利，只希望拎番五萬蚊保證金。參選九龍東嘅仲有陳鑑林、陶君行、梁家傑、譚香文。