政情：田北辰獲捧新西第四人
九月立法會選舉選情立立亂，其中以人口同議席都最多嘅新界西最混亂，十六張名單爭九個議席，淨係建制派已經有七條隊，競爭點會唔激烈吖。新界西近日傳出，建制派有見選情麻麻，早前已經改變目標，由最初嘅「力爭五席」，變為「保四爭五」，當中包括民建聯兩席、工聯會麥美娟，以及新民黨副主席田北辰！
以往立法會直選，泛民主派得票一直都佔優，不過呢個現象近年已經日漸淡化，建制派當初先會有爭五席嘅打算。不過當入到直路，種種民調都顯示建制派今次配票成效欠佳，操盤人權衡利害後，決定放棄原本排喺當選名單第四位嘅民建聯陳恒鑌（Ben），改為力捧支持度逐步上升嘅田北辰進佔呢個位置。
「龍瑞卿方案」已被放棄
據講，建制派對呢個安排都好無奈，但為顧全大局，只好壯士斷臂放棄屬明日之星嘅阿Ben。建制派四席既定，即係話另一位代表民建聯出選嘅新界社團聯會會長梁志祥可以勝出，梁志祥尋日出席造勢活動時強調，自己支持度仍然差幾個百分點先夠，今個星期就會入圍村拜票。佢尋日搵到影視明星李思捷撐場，唔通呢個都係搶票計劃一部分？
至於早排傳過，排喺民建聯主席譚耀宗（譚Sir）名單第二名嘅龍瑞卿都可能當選，龍瑞卿尋日同佢老公、屯門區議員陳雲生出席活動時，雙雙否認有機會勝出；不過咁，龍瑞卿亦都留下後路，強調如果選民真係選佢入去，一定會積極諗吓點做好立法會議員嘅工作。
所謂政治一日都嫌長，據我哋了解，「龍瑞卿方案」近日已被放棄，民建聯評估後，認同譚Sir得票唔足夠拉埋排名單第二位嘅人入立法會，與其浪費接近六個百分點嘅選票，倒不如喺合適時間過票畀梁志祥仲划算。譚Sir投票當日確保夠票之後，有可能會親自叫支持者投票畀梁志祥，力保民建聯新界西有兩席，既可以保住實力，亦可保住民建聯同新界社團聯會嘅面子喎。
新界西嘅候選名單仲有郭家麒、麥業成、梁耀忠、李永達、陳樹英、陳強、陳偉業、李卓人、曾健成、何君堯、陳一華。