化妝達人 萬聖節激發創意
【本報訊】哈囉喂猛鬼出籠，爛面原材料竟是「麥皮」及「魚膠粉」。從事迪士尼樂園化妝師逾五年的潘文珊（Vinci）激發創意，與團隊研發化妝材料，「我哋試咗好多材料，用食得嘅嘢來化妝，仲對皮膚好啲添！」她在迪士尼的萬聖節活動，將負責「鬼學校」的化妝，設計「魔鬼校長」等十多個角色。
Vinci中五畢業後，擔任牙醫助理兩年，再修讀化妝課程，做自由工作者，「以前做嘢收入唔穩定，有時幾個月都無收入，亦可以做三次嘢就有二萬幾蚊。」加入迪士尼後，所化的妝容由「靚女妝」變特技妝，需要更多不同技巧，「化靚女妝唔需要爛面槍傷、光頭套，亦唔使梳假髮，係入到嚟先至學到。」
堅毅男喜獲角色
隨着參與迪士尼的萬聖節工作，Vinci感技巧不足，遂申請公司資助往美國修讀舞台效果化妝，了解到中外化妝的文化差異，亦學到更多技巧，未來欲繼續進修，報讀相關學位課程，一圓大學生夢。她呼籲年輕人要勇於踏出第一步，認清興趣方向。
同樣堅持發展興趣的許鋻培○七年加入迪士尼擔任營運操作員，但他自小愛表演，入職後五次申請擔任演員及舞蹈等演藝角色，屢試屢敗，又常走到歌舞劇後台偷師，最終獲「獅子王慶典」猴子角色，「以前細個都會諗喺紅館開演唱會，但其實只要帶到歡樂畀客人就已經好開心。」