政情：梁陳智明爆退休大計
向來衣着品味都好「酷」、好潮嘅港鐵公司事務總經理梁陳智明（Miranda）尋日同一班老友講，話佢明年初就會退休，大家當堂Ｏ晒嘴，因為橫睇掂睇Miranda都唔似就嚟六十歲，不過大家都戥佢開心，因為從此可享受人生，佢仲滿腹退休大計，話退休後除了周六、日陪老公及繼續履行公職外，佢仲想學畫畫同藥膳，聽到都令人羨慕！
每次見到Miranda，都覺得佢活力十足、幸福滿分，有一次佢仲同記者分享佢個仔結婚擺酒及同老公旅行嘅相，大家都感染到佢嘅快樂。佢尋日都有出席神九航天員會見婦女界嘅聚會，話聽到女航天員劉洋講起如何由窮苦的生活，奮鬥成為第一個中國女航天員，佢都覺得好感動。
除咗Miranda就快退休，港鐵財務及業務拓展總監梁國權（Lincoln）喺七月中已升任為港鐵副行政總裁，至於其原來財務總監職位，集團正進行內部及外間招聘，在搵到合適人選前，Lincoln都要拍心口頂住先。