政情:鄉紳轟民記抹黑新界人

立法會選舉新界西爆出「黑金政治」疑雲,民建聯參選人梁志祥向廉政公署舉報有候選人向「鄉頭」買票,而且每個鄉頭畀幾百萬元,事件激嬲元朗一眾鄉事委員會主席。咁啱尋日鄉議局開大會,元朗幾個鄉頭齊齊發表聲明,要求梁志祥道歉,批評佢搞埋啲小動作只為選舉撈票。

幾個鄉頭中,又以廈村鄉鄉委會主席鄧勵東最激動,佢話食得鹹魚得抵得渴,如果佢真係有收錢,畀人唱通街都唔緊要,最慘係連鹹魚都冇食過,無端端被屈收錢賣票,真係冤枉。另一位同樣以激見稱嘅十八鄉鄉委會主席梁福元,亦拍晒枱大鬧民建聯用「黑金政治」抹黑新界人,實在好無道義,又話新界人過去十幾年嘅選舉,都幫民建聯抬轎,但依家竟然忘恩負義。

一眾元朗鄉頭咁嬲,但鄉議局主席劉皇發好似冇咩感覺,唔單止無力撐佢哋,仲幫梁志祥講好說話,話可能係傳媒錯誤引述喎。不過,當日好多人聽到梁志祥咁講,發叔真係噏得就噏。至於封聲明書,發叔就話要畀律師過目,否則唔可以用鄉議局名義發出喎。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報