中環出更：黃天祐追隨二胡大師學藝
卓妮早前一個下午行過皇后大道中嘅中遠大廈時，見到二胡大師王國潼喺度出現，原來佢去探望香港董事學會主席兼中遠太平洋董事副總經理黃天祐（Kelvin）。雖然Kelvin身在分秒必爭嘅財經界，但係對中國樂器嘅熱情不減，除咗學過古箏，幾年前仲追隨王國潼及王憓父子學拉二胡，依家二胡成為佢減壓良方添！
王國潼父子聞名天下
Kelvin曾任香港中樂團主席，對中樂嘅喜愛唔使多講。「二胡王子」王憓係佢嘅入門師傅，學咗三年後「升呢」同大師級嘅王國潼學多兩年幾，難怪水準有番咁上下。王國潼嘅精湛二胡藝術聞名天下，八月初將喺杭州開國際二胡藝術大師班，連日本都有十幾名粉絲報名。
王憓經常諗住要令二胡嘅形象變潮，早前佢同博愛醫院總理林辰峰、香港僑界社團聯會青委成員費志恩飯敍時，點子多多，話要多啲同流行歌手合作，甚至嘗試演奏Hip Hop音樂，勢要年輕人對二胡刮目相看。