政情：新同盟九人晒冷破紀錄
由民主黨分裂出嚟嘅新民主同盟，喺去年區議會選舉表現相對出色，喺新界東贏得八個議席，原本以為恨選立法會好耐嘅西貢區議員范國威（Gary），今屆終於可以喺新界東出選。不過，立法會選舉同區議會選舉始終係兩回事，有政黨做嘅民調就顯示Gary嘅立法會選舉支持度極低，因此白鴿黨先至夠膽喺新界東派出三張名單參選，擺明當佢哋嘅舊黨友Gary無到。
為咗力撐Gary，新同盟尋日宣布將用盡新界東參選名單嘅九個名額，排晒其餘七名區議員再加一名黨員落去抬轎，打破歷來同一名單最多參選人嘅紀錄。競選策略方面，新同盟會標榜自己係堅定民主派，與拜訪過中聯辦及支持政改方案嘅白鴿黨劃清界線。
講開抬轎，同樣參選新界東嘅自由黨榮譽主席田北俊，據聞選情亦未如理想，要出動原已決定棄選嘅副主席周梁淑怡排喺名單第二。周太仲會搵埋佢當年做電視台識落嘅老牌演藝界人士助選，幫田少拉多啲師奶票。