政情：郭榮鏗參選 老婆辭職支持
九月立法會選舉，多個功能界別都有新臉孔參選，其中喺法律界，泛民主派會改派僅得三十四歲嘅年輕大律師郭榮鏗（Dennis）出戰，建制派就派出形象相對獨立嘅前律師會會長王桂壎，相信會有一番惡鬥。Dennis任職事務律師嘅太太，最近就辭咗律師行嘅高薪厚職，專心湊仔同全力撐老公參選，等Dennis可以無後顧之憂。
其實早喺四年前已經有人游說Dennis參選法律界，但當時佢啱啱結婚無耐，太太其後仲大埋肚，因此決定以家庭為重暫時唔參選。依家佢囝囝已有三歲大，太太亦好尊重佢參選嘅決定，最近仲辭埋職力撐老公，令Dennis下定決心出戰。
據聞Dennis太太任職一間國際知名嘅律師行，而且佢專做收購合併業務，收入隨時多過任職大律師嘅老公。加上一旦Dennis當選咗做議員，私人執業時間一定大減，一上一落家庭入息肯定差咁一大截，損失咪話唔大，所以連個仔入讀邊間幼稚園都要諗過度過呀。