政情：撒尿小童 幫香港辟邪？
香港回歸十五周年紀念活動告一段落，但遠在比利時嘅布魯塞爾，前日仲有個餘慶節目，就係幫當地著名地標「撒尿小童」銅像換上印有飛龍圖案嘅「香港中山裝」，此舉係駐當地經貿辦事處提出嘅，莫非當地職員咁有心，知道近期香港多濕滯嘢，想用「童子尿」為香港辟邪？
着飛龍中山裝贈興
話說香港駐布魯塞爾經濟貿易辦事處早前將呢套飛龍中山裝嘅設計，提交畀當地市長及部長辦公室，以及撒尿小童銅像委員會，獲得接納後，前日就為銅像換上新衣一天，以標誌兩地嘅友好關係。撒尿小童銅像唔止衣着新潮，仲好追得上科技，佢「手持」平板電腦，象徵香港連接世界嘅時尚。
不過，最得意嘅係平日撒尿小童銅像噴出嘅水，當日就變為噴啤酒畀嘉賓享用，啤酒顏色好似尿，莫非真係想營造「童子尿」為香港辟邪嘅效果？撒尿小童銅像原為全身赤裸，但自十七世紀末起至今，但凡特別節日都會為銅像着衫，依家已經擁有超過八百套服裝，保存喺布魯塞爾市立博物館。