政情：葉劉變臉插政府
新民黨主席葉劉淑儀加入行政會議臨尾甩轆，佢近日突然一改挺梁作風，掉轉槍頭狂踩新政府接二連三爆發誠信危機，尋日更透過自己發迹嘅匯賢智庫一個講座上連環掃射，狠批行會召集人林煥光（WK）考慮辭去行會一事太過兒戲，又叫特首梁振英（CY）盡快搞掂新班子誠信問題，莫非葉劉因為失落行會而心中有氣？無論點都好，佢今次舉動簡直就係將川劇變臉絕技發揮得淋漓盡致。
三個星期前，政府要求立法會優先處理政府架構重組決議案，原本以為一定可以成功，可惜天意弄人，葉劉最後投下決定性嘅棄權票，決議案被否決，搞到前政務司司長林瑞麟望住投票結果「Ｏ晒嘴」。
葉劉尋日喺匯賢智庫講座分享呢段往事，聲言當時已經有言在先話會投棄權，但政府竟然無搵佢箍票喎，擺明係想插政府辦事不力。佢仲爆料話，前政制及內地事務局副局長黃靜文喺投票前兩分鐘先至施施然行過去叫佢唔好投反對票，但佢以「唔想變橡皮圖章」為由一口拒絕。
葉劉毫不留情大鬧舊政府，但估唔到佢連相識多年嘅政府舊同事WK及發展局局長麥齊光都一樣無面畀。葉劉話，雖然佢同WK分屬好友，但當佢聽到WK要考慮辭去行會召集人嘅時候，第一個反應竟然係：「你兒唔兒戲啲呀！」無理由做咗召集人唔夠一個星期就話考慮劈炮唔撈，又話如果CY唔盡快搞掂新班子嘅誠信問題，將會不利新班子嘅強政勵治喎。
舊年撐派錢 今年唱反調
有傳CY下星期會推出一系列惠民紓困措施谷民望，葉劉就警告新政府唔好亂派錢花盡庫房積蓄。不過翻查紀錄，政府去年提出向每位市民派六千元，當時第一個跳出嚟支持嘅就係葉劉，佢尋日竟然話政府唔可以攞晒納稅人啲錢去派糖，又話咁係違反審慎理財原則，實在難以理解。葉劉最後仲希望新民黨喺九月立法會選舉可以搶到兩至三席，等佢哋可以有多啲談判籌碼，睇嚟葉劉似乎仲有後着喎。