中環出更：葉澍堃領軍搵食 殺入深水埗
同識食老饕交朋友，唔憂無啖好食，好似識飲識食嘅馬會大董葉澍堃（Stephen）夫婦，前晚就約埋香港大學校長徐立之、副校長周肇平及譚廣亨夫婦、新聞處處長黃偉綸夫婦、信興集團副主席蒙德揚等一行十二人組隊去深水埗搵食。唔講唔知，原來徐校長曾經係深水埗之友，以前讀書年代朝朝五點鐘就起身去福華街爭球場踢波，瞓晏啲都無位。
香港人其中一樣最引以自豪嘅，都係大家當年捱出頭嘅獅子山下精神，五十後嘅徐校長話，當年佢就讀嘅中學，要借用喺福華街嘅學校校舍上堂，所以今次Stephen帶隊去福華街嘅「容記小菜王」開飯，徐校長都唔怕蕩失路。
徐立之那些年霸位踢西瓜波
不過，大家唔好問徐校長知唔知福華街一帶有咩好食，事關佢當年嘅活動範圍只限於學校同波地，當時個籃球場朝朝都有六隊人踢波，而佢家住牛池灣，為免晏咗要逼車，所以朝朝五點就起身返學校，順便幫同學霸位踢西瓜波，放學就行去荔枝角搭車返屋企，肚餓就整番碗賣斗零嘅淨麵，生活好樸素。
今次有Stephen帶路，徐校長唔使食淨麵喇！容記老闆易偉容亦無甩拖，先奉上皮脆肉嫩、肥瘦適中嘅米芝蓮燒肉畀大家開開胃，再上香口嘅「椒鹽壹嘴」（墨魚嘴），接住係一味「清水浸飛雞」，畀大家試下味鮮且甜嘅走地雞湯，入口鮮甜，搞到徐校長都忍唔住埋爐邊偷下師，順便滿足佢科學家嘅好奇心。
飲完湯就輪到四斤重嘅古法頭抽蒸鯇魚出場，肉質嫩滑之餘，仲完全無泥味，食到大家都直豎拇指。徐校長細個成日落旺角街巿買平靚正鯪魚畀爸爸佐飯，熟晒街巿行情，一睇就話條魚絕非街巿貨色。
頭抽蒸鯇魚 魚塘入口夠新鮮
哈哈，易老闆見有高人坐鎮，都直認條魚喺元朗魚塘直接入口，絕對新鮮！講開又講，去得深水埗，點可以唔試下坤記嘅白糖糕，徐校長唔嗜甜，食一舊試下味就算，但不忘帶返屋企孝敬老婆，完全係白糖糕加糖，徐太仲唔甜到漏？
卓妮