貪曾前晚十一點鐘遷出禮賓府，事前已將家當執得一乾二淨，無論公家或私人物品都全部搬走晒。不過，原來唔單止咁，前特首辦仲喺前晚貪曾遷出一個鐘頭後，連社交網站facebook（fb）嘅特首辦專頁都剷埋，換句話過去貪曾嘥公帑活動或自吹自擂等宣傳、市民對佢嘅批評等，都消失於世上，都係好事嘅，事關市民唔使再見到貪曾眼冤。
有份負責管理fb特首辦專頁嘅前特首辦特別助理陳岳鵬就話，剷走fb戶口除咗因為政府換屆外，仲希望留番啲空間畀新政府製作自己嘅新媒體；佢又感謝過去網友嘅互相交流，講聲「後會有期」。
至於特首辦嘅官方網頁，尋日下午已換上新特首梁振英（CY）嘅資料，除咗載有CY嘅個人資料外，仲上載咗新鮮滾熱辣嘅新政府班子就職嘅資料及相片，令網頁耳目一新。