政情：黃宏發「長駐」新大樓走廊
立法會新大樓嘅會議廳外走廊牆上掛咗歷屆立法會主席嘅油畫，但入伙咁耐只係得現屆主席曾鈺成同前主席范徐麗泰兩幅油畫。
不過，尋日就突然新增咗兩幅，原來就係立法局年代嘅兩位前主席施偉賢爵士同黃宏發（Andrew）嘅肖像，Andrew尋日仲特登帶埋太太到立法會喺油畫前影相留念添。
原來立法會前晚將兩幅油畫掛咗喺會議廳外，於是尋日就請咗Andrew同佢太太到立法會食飯。Andrew話影呢幅相時，中環舊立法會大樓入面已經拆咗，所以惟有喺大樓出面影，為咗影相畀立法會畫呢幅油畫，佢企咗成兩個鐘，擰來擰去擺甫士，都咪話唔攰。