火劫奪三子女 阿杰求援

無情火災令家園付諸一炬,更奪去三名幼童的寶貴生命。港人內地親友馬華杰早前因家園突然起火,四名幼童被困屋內,最終只有六歲長女獲救。馬華杰痛失幼兒後與妻傷心欲絕,但同時又為三名幼兒殮葬費及女兒巨額醫療費而徬徨。事件經報道後迅即獲善長捐輸,東方日報慈善基金已將五萬多元善款悉數轉交,為阿杰暫解燃眉之急。

「我寧願死嗰個係我,點解要幾個咁細小朋友受啲咁嘅苦?」現年二十五歲的阿杰為中山人,與妻子謝海琴育有四名子女,但幸福家庭卻遭一場無情火徹底摧毀。阿杰指事發當日只有六歲的長女音琪獲鄰居救出,兩歲的雙胞胎光宗與耀祖經連日搶救後不治,至於五歲的次女音婷更於大火中活活被燒死。

今年三月二十七日早上,阿琴趁四名子女熟睡後外出買菜,未料十分鐘後提菜返家即見烈燄沖天,意外後阿琴不斷自責,終日以淚洗面,僥倖逃出生天的音琪現時手腳仍然腫痛、身體亦留有傷疤,情況尚算穩定,「佢(音琪)唔知啲細佬妹已經死晒,間唔中就會問我哋:『爸爸媽媽,BB(雙胞胎弟弟)、妹妹去咗邊?』」為免女兒傷心,夫婦兩人只能強顏歡笑,以「佢哋去咗第二度玩」作回應。

尚欠巨款 幸存長女無錢上學

喪親之痛尚未平復,阿杰仍要為償還龐大醫療費用而四出籌措,「醫院話搶救幾個仔女總共用咗十幾萬,但我真係冇錢還,依家都唔知點算。」阿杰原在印刷廠當雜工,月入不足人民幣二千元,阿琴婚後則一直在家照顧子女,積蓄已悉數繳付醫療費用,面對尚有巨額欠款,阿杰顯得非常無助,「怨就怨自己冇用,連仔女都養唔到……」

音琪原應在今年九月上小學,現因無法籌措學費,料將被迫留在家中,阿杰坦言「對唔住」女兒。對善長的無私捐助,阿杰嘆無以為報,只能致以無限感激。

捐款編號:12267

記者:伍思明

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報