道歉道歉又道歉，因乜事幹呢一排咁鬼死多人道歉嘅呢？莫非香港除咗係「僭建之都」，同時亦係「道歉之城」？
貪腐醜聞纏身嘅曾蔭權固然有必要道歉啦，只不過「扮哭無淚」咁解啫，跟手候任特首梁振英出現僭建問題同樣要道歉，一個屈尾十竟然輪到民主黨道歉。道歉即係做錯事，本地官場政壇咁大棚人接二連三做錯事，確係蔚為奇觀到眼冤。
民主黨向公眾致歉嘅原因係黨員唔生性，一個二個缺席玩失蹤，導致立法會不足法定人數，結果又係流會收場。唔生性嘅黨員包括李華明、黃成智、張文光以及何俊仁。呢個黨嘅副主席劉慧卿就話嘞，日後會呼籲黨內八名議員盡量留於立法會大樓之內，民主黨日後亦會繼續要求點人數，因為呢個係議員嘅權利。
喂，既然要求點人數，好心民主黨徒就唔好自我人間蒸發啦，醜死怪呀，好瘀皮㗎。難怪有出席議員話感到極之憤怒，認為現時已經有好多積壓嘅法案要處理，不明白點解部分議員仍然要拖延。
唉，流會呢家嘢都唔係第一次㗎喇，功夫茶真係好質疑，議員何德何能收咁高人工，又經常呻窮要求加薪？流會一來浪費公帑，二來阻礙民生議題，小市民隨時蒙受損失。議員身為民意代表，理論上係要為百姓謀福利，選民用選票踢政客入會，都係希望有人開會為民請命啫，一次又一次流會簡直係所託非人。
計功夫茶話齋，今年九月選舉真係要睇清睇楚，唔好再被政客愚弄。選民第一件事要做嘅，當然以選票懲罰保皇成癖嘅「護貪黨」啦，等你哋包庇貪曾包庇得咁過癮吖嗱。其次，選民亦要同「失蹤黨」劃清界線，邊個遲到早退呀，邊個三點不露呀，邊個偷懶蛇王呀，統統要佢哋永遠缺席，等你哋玩失蹤玩得咁抵死吖嗱！
對於今次流會，立法會主席曾鈺成話喎，會議時間損失十五至十六小時，要留待星期三先至能夠繼續會議。未來仍有二十七項議案必須審議，包括政府重組嘅決議案，現時要徵詢議員意見，未來是否通宵開會，以及星期六同星期日都要加開兩整天嘅會議。
若然有必要通宵開會，功夫茶奉勸各位自找麻煩嘅尊貴議員，唔好再喺議會之內瞓着覺，更加唔好瞓到流口水，失禮街坊㗎。香港嘅形象已經被貪曾破壞到七零八落，萬一議員瞓覺嘅死樣再被外國傳媒拍低而蜚聲國際，香港乜面都冇啦。
總而言之，唔該民主黨閂門打狗好好教訓劣徒，唔好做一個失蹤黨，否則九月選舉有得你受呀！