政情：CY陪愛妻睇演唱會補飛
候任特首梁振英（CY）近日忙於落區同面試副局長，佢太太唐青儀日前喺候任辦見到記者時，就笑言係嚟應徵做梁太，好似投訴丈夫忙到連老婆都唔得閒見。
尋日CY完成另一輪副局面試後，就帶埋太太，再加上下屆食物及衞生局局長大熱嘅高永文夫婦，拍住拖一齊去灣仔會展欣賞本港女歌手葉麗儀、陳潔靈同著名小提琴演奏家姚珏合作舉行嘅《萬般情．弘．今晚夜》演唱會，希望梁太會冧番啦！
據知CY一行人喺演唱會開始前入咗後台探班，與三位歌手同樂手傾偈及合照留念，之後佢哋仲坐喺第一行正中位置睇騷。
不過CY夫婦絕非濫用特權，查實梁太認識咗葉麗儀同陳潔靈好耐，係佢哋嘅忠實粉絲，梗要留番幾個靚位畀自己老友啦！