端午節就快到，煤氣公司同往年一樣捐咗大批食材畀各區區議員同團體包糉，再將糉送到老人院或者長者中心送畀啲老人家。去年首度當選中西區區議員嘅蕭嘉怡（Kathy），尋日就跟一班義工學包糉，但佢笑自己包糉速度好慢，幾分鐘先至包到一隻，而且仲包到奇形怪狀，三角形、長方形、總之乜形都有，所以唔敢請朋友食，仲叫收到佢啲怪糉嘅長者多多包涵喎。
Kathy話，雖然佢係首次以區議員身份包糉，但其實佢細個時，每年都有睇住爸爸包糉，從旁偷師，只可惜咁多年都只係識得「屈」好塊竹葉放入材料，但就唔識用水草紮好隻糉，經常搞到隻糉條條fing，甚至紮到奇形怪狀添！
尋日大家總共包咗三千隻糉，Kathy只係包咗好小量，相信攞到佢隻「靚女愛心糉」嘅長者唔會太多，如果攞到真係當「中獎」呀！