政情：副局遴選泛民輸打贏要
新一屆政府嘅副局長面試進行得如火如荼，唔少傳媒日日喺候任特首辦打躉，以便第一時間報道有乜嘢人應徵做副局。本身都有黨員去應徵嘅泛民，尋日喺立法會向候任辦主管羅范椒芬發炮，話成個遴選安排保密工作做得唔好，搞到啲應徵者好似選美咁要暴露於記者鏡頭前。回想○八年貪曾擴大問責制招聘首批副局同政治助理時，鬼鬼祟祟咁喺陽明山莊落閘揀蟀，班泛民就鬧爆政府黑箱作業、揶揄班應徵者個個唔見得光，依家佢哋自己有黨員應徵畀人影到，又立即變臉呱呱嘈，呢啲咪叫輸打贏要、雙重標準囉！
立法會財務委員會尋日繼續審議新政府架構重組嘅開位撥款申請，泛民繼續拉布，其中公民黨同民主黨仲無喇喇攞副局嘅面試程序嚟講。公文袋吳靄儀首先批評面試過程保密不足，搞到啲應徵者暴露於鏡頭前面，好似畀人撚化咁。白鴿黨何俊仁亦話，「如果請咗都可能補償到嘅，唔請咪搞到啲應徵者好尷尬囉。」要求羅太向所有應徵者道歉。羅太就否認刻意披露任何應徵者嘅身份，話其實係因為有負責物色人選嘅遴選委員會成員公布咗面試日期，先有記者喺度守候採訪，佢哋已經同應徵者解釋。
記得○八年貪曾擴大問責制時為咗避開傳媒，專登懶神秘咁揀喺陽明山莊，為首批副局政助應徵者進行面試。點知班副局政助一上任就爆發國籍醜聞同卡片風波等連串事件。嗰陣班泛民就齊聲炮轟政府黑箱作業、用人唯親，先搞到咁嘅局面。依家喺候任辦改以更開放同透明嘅方法面試，佢哋又話人冇職業道德。
再者，做得副局同政助，面對傳媒係必要工作之一，遴選委員會今次安排，變相係免費請咗班傳媒，預先測試吓啲副局政助應徵者嘅面對傳媒能力，幫政府慳番唔少公帑同避免請錯人，對公眾嚟講絕對除笨有精，估唔到泛民咁都要反對。
社民連黨員應徵政助
白鴿黨同公文袋咁大反應，好可能係因為佢哋自己有黨員應徵副局政助被踢爆。先有馮煒光因為應徵副局搞到退出白鴿黨，後有蔡海偉同公文袋講拜拜，搞到兩黨極度尷尬。我哋最近仲聽到，就連激進泛民政黨社民連，都有黨員遞表申請做政助，不過該黨前主席陶君行就堅稱，今次佢哋應徵，純粹係想測試同挑戰有關制度，如果獲邀面試，就會帶埋錄音機出席。究竟係泛民缺德定係候任辦冇道德，大家自行判斷喇！