投訴：「紙板」保安 開工揾周公
流動小販佔領主場，領匯保安竟公然「大覺瞓」！華貴商場屬領匯管轄範圍，負責保安工作的保安員非但未有履行職責驅趕場內無牌小販，更於當值時公然睡覺，被指嚴重失職兼違反《保安條例》。區議員直指相關問題已拉鋸兩年，不滿領匯縱容無牌小販的同時，亦無視職員違規；立法會議員則狠批領匯未有妥善監管外判公司，須為助長違規行為負上責任。
陳先生每晚下班的歸家之途必須取道華貴商場，發現商場通道長期被「擺檔」的無牌小販佔據，「晚晚最少有幾架車仔喺度賣嘢，一罐罐石油氣仲周地擺，真係好危險！」惟最令陳先生看不過眼的，則是保安員儼如「紙板公仔」，不但無視小販擺賣，當值期間更公然在崗位上睡覺，「啲小販喺正個保安崗位前面開檔，個保安竟然可以當睇唔到兼大覺瞓，領匯點解咁都唔理？」
記者曾多次實地了解，每次皆見保安於崗位上由「齋望」變成「釣魚」，不敵睡魔時更會托頭沉睡。即使有保安員「路過」小販檔亦只「掂行掂過」，小販其後更明目張膽地將檔位遷至「切勿光顧無牌小販」告示牌前擺賣，大有向領匯挑戰之意。
佔據兩年未解決
當區區議員麥謝巧玲直指上址小販問題已拖拉超過兩年，領匯處理卻毫不積極，「同佢哋（領匯）已經講過無數次，之前因為講得太多，領匯先擺啲圍欄做下樣，結果反而阻住居民出入，完全係本末倒置！」麥謝巧玲坦言對領匯的表現大感失望。
「保安喺當值時間大覺瞓擺明犯法，領匯咁都可以縱容，仲唔係失職？」立法會保安事務委員會委員黃國健狠批領匯管理不善，有檢討現有監管機制的必要，並須加強巡察，確保保安員工作表現合乎標準。黃國健又指，小販問題雖難即時根治，但認為領匯亦有責任管好「主場」，而非「隻眼開隻眼閉」，「如果領匯自己搞唔掂，就應該向食環署或者警方求助！」
領匯發言人稱，已將保安員當值期間的表現問題交由保安公司調查及跟進，對方承諾如投訴屬實，將對職員採取紀律處分。至於非法熟食小販問題，發言人承認早已知悉，並已實施多項措施應對。
警方發言人則證實，簽發保安人員許可證的條件其中一項為「不得違反保安人員的工作規定，例如不得在值班時睡覺」，如違反許可證條件，警方可作出檢控，一經定罪可判罰款一萬元及監禁三個月。
記者：何穎賢