一個正常嘅社會，黑就係黑，白就係白，是就係是，非就係非，如果有人夾硬顛倒黑白，混淆是非，呢個社會想唔烏煙瘴氣都幾難。好不幸，香港正正有一班政客不分是非黑白，盲目包庇貪官，令香港嘅廉政及法治蕩然無存。嗱，大家認住吖，佢哋就係助紂為虐、狼狽為奸嘅保皇黨喇！
曾蔭權爵士貪威識食，傍住富豪黐飲黐食不特止，仲要利用公帑豪遊列國，而且唔貴唔住，醜聞被審計署踢爆後，全城一片嘩然，反貪怒潮一浪高過一浪。素以廉潔自居嘅香港，竟然出咗呢個大貪官，乜嘢形象都冇晒，身負監察政府職責嘅立法會係咪應該為民發聲，伸張正義先？
係就係有人發聲，可惜依然伸張唔到正義呢。話說立法會內務委員會日前開會，泛民議員提出三項反貪曾動議，要求佢回水兼落台，點知保皇黨為咗包庇貪曾，竟然學人玩拉布，透過不斷提出瑣碎問題拖延時間，癱瘓會議，結果三項反貪動議連傾都唔畀傾，貪曾又避過一劫，繼續逍遙法外。
保皇黨恃住人多勢眾，築起血肉長城保護貪曾，連素有立法會大懶蟲之稱嘅李國寶、黃宜弘之流都由頭到尾坐定定，唔到你唔服。最好笑嘅係，呢班平時絕少發言嘅政客護貪心切，竟然個個爭住大發歪論，連「貪曾出差住得太寒酸，會影響香港體面」咁荒謬嘅說話都講得出口，簡直醜陋到極。
仲有吖，有保皇政客講到冇嘢好講，夠膽死拖埋前朝港督同前任特首落水，反指審計署唔應該淨係批評貪曾濫用公帑，應該同前任比較先至公平喎。喂，唔通前人揮霍後人就可以跟住揮霍，前人貪污後人就可以跟住貪污，呢啲究竟係乜嘢混帳邏輯吖？大家睇到啦，貪曾之所以貪得無厭，有恃無恐，咪就係多得呢班九唔搭八嘅政客囉，貪曾無恥，佢哋都不遑多讓嘅咋！
有學者指出，保皇黨公然維護貪曾，即係維護貪腐，令到香港一直引以為榮嘅廉潔核心價值蒙羞。其實計功夫茶話齋，保皇黨不分是非維護貪官，唔止係與民為敵，簡直係摧毀香港核心價值嘅千古罪人，遲早會有報應o架！
講開又講，香港人其實都幾無奈，回歸不過十五年，立法會竟然淪為「垃圾會」，議員不務正業，唔係拉布，就係護貪，沒有最醜，只有更醜。嗱，九月就係立法會選舉喇，選民千祈擦亮眼睛，一定要用選票踢走呢班無恥政客吖！