三個月後就係立法會選舉，要爭取大眾眼球，惟有施展渾身解數爭取曝光，懷舊就係其中一個好選擇。新民黨立法會議員葉劉淑儀近日接連上載一啲陳年照片到社交網站facebook，尋日更出動咗一張八十年代嘅「珍貴回憶」出嚟同大家分享，仲好感性話：「照片中的我芳華正茂，如今女兒都大學畢業了！」
其實每個人都有「芳華正茂」嘅年代，原來當年三十一歲嘅葉太已經不苟言笑，能否成功吸引大家嘅眼球，真係各花入各眼。不過諗諗吓，葉太似乎不在憶芳華，而係另有所指。
話說相中嘅葉太時任首席助理政務司，當日其實係拉大隊帶新聞官以及行政主任去到香港電台，推廣第一屆區議會選舉，仲獲得人稱「雲大姐」嘅港台雲影畦接待添！似乎葉太貼呢張相唔係為拉票，而係想話畀人聽佢八十年代已經涉足選舉，第一屆區議會已經有佢份，真係犀利。