政府換屆在即，民望一直相對較高嘅保安局局長李少光，尋日就喺電台節目上交代去留問題，透露候任特首梁振英已幫佢搵到「接班人」，令佢可以放心離開崗位喎。不過，光哥話離任後，佢都會好樂意「以唔係做官嘅身份」繼續服務香港、服務國家，唔通佢暗示有關方面會對佢委以重任？
光哥喺港府做咗三十八年半、做局長大約九年，佢話年紀已經超過公務員退休年齡，覺得係時候要停一停，又話人生到某一個階段，就要重新去做另外一啲嘢，開展新生活。言談間，佢坦言覺得過去對家人少咗啲關顧，所以想離任後畀番啲時間家人喎。
而任內印象最深刻嘅工作，光哥就話分別係世貿部長級會議及《截取通訊及監察條例草案》嘅立法工作。佢臨別寄語繼任人，要本住服務香港社會嘅心，領導各支紀律部隊，令香港成為安全自由及和平嘅城市。唔知盛傳接棒嘅現任副局長黎棟國聽到未呢？