政情：張文韜忽然蒲頭博留低
發展局局長林鄭月娥盛傳好大機會出任下屆政務司司長，近日出席活動時都顯得神采飛揚，更成為政圈嘅「風頭躉」，連隱形多時嘅發展局政治助理張文韜，尋日都跟住老闆林鄭出席西九新動力就職典禮，學習同地區人士打交道。身為民建聯成員嘅張文韜直選無望，依家忽然好學，明眼人一睇就知佢想博喺七一後留低啦！
回應傳聞能力低幾班
不過，張文韜嘅臨急抱佛腳，連林鄭政治能力嘅雛形都未學到，回應傳聞嘅能力自然更加低幾班。對於政圈盛傳佢會「升呢」做副局長，張文韜話依家無乜好講，即使追問係咪會留低呢個簡單問題，佢亦僅回應「到時再傾」。到時再傾梗係好過無啦，只怕佢到時又係縮埋唔想傾偈。
相比之下，同樣為政助嘅民政事務局政治助理徐英偉談及去留問題時有內涵得多，佢出席新家園嘅活動時，雖然無正面作出評論個人去留，但佢表明有心為香港服務，又透露如果現任政助有意留低，可直入第二輪遴選唔使另作申請喎。