政情：民建聯黨慶又變臉
世風日下，道德淪亡，民建聯前日先至喺立法會瞓身包庇貪曾，到尋晚該黨舉行成立廿周年文藝匯演，邀請咗「新主子」候任特首梁振英主禮，該黨又立即變臉。黨主席譚耀宗喺致詞時，不點名暗批貪曾形象太差，拖累經常保皇嘅民建聯形象，希望新政府上場後會有一番新氣象，改善施政及「有個好形象」喎。
民建聯又邀請咗政制及內地事務局局長譚志源、特首辦主任梁卓偉、特首辦特別助理陳岳鵬、以及本身係民建聯成員嘅商務及經濟發展局局長蘇錦樑（Greg蘇），一齊上台合唱林子祥名曲《分分鐘需要你》，以示政府需要該黨保駕護航，肉麻當有趣。Greg蘇事後話，自己唱得唔好唔緊要，因為有梁卓偉「負全責」同譚志源「負雙倍全責」，暗寸貪曾同兩位同事，極度無品，果然係民建聯出品！