政情：認清認楚 最醜陋保皇議員
立法會內務委員會前日群魔亂舞護貪曾，喺建制派聯手拉布同投票下，否決即時討論民主黨提出嘅三項反貪曾動議，連傾都唔畀傾，非常醜陋。其實前日內會一共投咗五次票，其中幾次嘅贊成同反對票數略有不同，喺仔細分析下，可以發現有幾位建制派議員可謂醜中之醜，當中最可恥就係嗰啲把口就鬧貪曾、投票就勁保皇嘅功能界別議員，選民記住要擦亮眼睛，唔好畀佢哋欺騙到呀！
前日內會嘅頭兩項投票，係決定應否即時喺內會討論要求貪曾回水同引咎辭職嘅動議，結果同以十八票贊成對廿三票反對被否決。第三同第四項投票，係決定應否喺內會同政制事務委員會討論審計署揭露貪曾豪華外訪嘅報告，結果分別以十七及十八票贊成對廿三票反對，雙雙遭否決。最後通過由極之無殺傷力嘅工商及經濟事務委員會去討論貪曾報告，真係不知所謂。
林健鋒熬底投棄權掩飾
綜合五次投票，有三名建制派由始至終都投反對票死撐貪曾，佢哋就係經濟動力嘅梁劉柔芬（蘇菲梁）、廠商會嘅林大輝同新民黨主席葉劉淑儀，當中蘇菲梁同大輝堅貞保皇，大家唔會感到意外，但曾經多次公開狠批貪曾嘅葉太都轉咗軚，就真係令人失望。至於蘇菲梁嘅黨友林健鋒就仲衰，四次投咗反對票護曾，到最後一次投票又唔敢表態改投棄權，保皇都保得樣衰過人！
除咗呢四大保皇議員，自由黨三名議員劉健儀、張宇人同方剛、以及專業會議何鍾泰同劉秀成，行為亦同樣醜陋。其中張宇人、方剛、何鍾泰同劉秀成，前日明明喺立法會出現過，但偏偏去到表決五項貪曾動議時就集體失蹤，明顯係擔心保皇保得太揚會得罪市民。
劉健儀護短後擺檔做騷
身兼內會主席嘅劉健儀就仲離譜，早幾日佢先鬧過貪曾醜行「天理不容」，到前日主持會議卻處處偏幫貪曾，尋日佢又再變身，喺銅鑼灣街頭擺檔做騷，話要收集市民對貪曾下台嘅意見喎。其實要求貪曾下台嘅民意早已非常清晰，再收集民意唔係想「抽水」，就係蒙騙選民。至於最早提議彈劾貪曾嘅旅遊界謝偉俊，亦缺席晒五次投票，等同死撐貪曾，莫非唔怕選民要佢票債票償？