中環出更：大細劉同場現身耐人尋味
華人置業主席劉鑾雄（大劉）繼前日同麗新集團主席林建岳前後腳到灣仔富豪飯堂「福臨門」食飯，尋日佢又同家人到福臨門撐枱腳，連親細佬、人稱「細劉」嘅利福國際集團董事總經理劉鑾鴻都有現身，莫非有重要事情要召開家庭會議商討？
前日大劉抵達福臨門時頭耷耷，全程愁爆，雖然尋日佢個頭抬番高少少，但依然無乜表情。梗係啦，佢捲入澳門前運輸工務司司長歐文龍巨貪案，而且其中五幅土地正就係大劉旗下華人置業興建嘅「御海．南灣」樓盤，澳門政府早前更加放風聲話不排除會依法收回土地，大嗱嗱成二百億元投資分分鐘會化為烏有，就算經歷過幾大風浪嘅人都一樣會心亂如麻啦！
有人話一個人處於困境，自然會諗起家人。咁啱得咁蹺，尋日大劉原來真係約埋家人去食午飯。
疑似開家庭會議
最早到場嘅係母親葉淑婉及妹妹劉玉珍，之後「紅顏」陳凱韻（甘比）同囡囡乘七人車到場，而近期被指經常傍住貪曾嘅細劉亦緊隨出現，一家大細咁齊人，似係召開家庭會議咁款。眾所周知，大劉同細劉好少一齊出現，大細劉同場現身，真係耐人尋味，唔通大細劉要同家人訴苦？
事實上除咗大劉捲入澳門巨貪案搞到一身蟻外，細劉亦正值多事之秋，事關澳門巨貪案案情指佢同大劉曾開出一張二千萬元支票，筆錢輾轉存入歐文龍戶口。細劉今年二月亦曾「傍住」貪曾同江湖人士共同出席澳門賭場春茗，之前又曾貼身護送貪曾到大劉位於澳門嘅「御海．南灣」樓盤參觀，細劉同貪曾過從甚密認真令人疑竇。貪曾被廉署調查，相信貪曾身邊嘅人亦好難走得甩喇。
卓妮