丹麥爆冷擒荷蘭
荷蘭落筆打三更，於「死亡之組」首戰鬥丹麥輸0:1，出線路難行！今日凌晨零時歐國盃B組賽事，荷蘭攻足90分鐘，但王牌射手尹佩斯腳頭無靈射極不入、「黑仔王」洛賓射中柱、亨特拉爾連單刀也失機，輸波咎由自取。奧地利博彩公司「bet-at-home」，於網頁宣傳中用釘釘死荷蘭波衫公仔，難道今次「橙軍」真是被咒死？
荷蘭今戰打451陣式，尹佩斯打單箭頭，史奈達作後上支援，洛賓就壓住右路進攻，左閘積祖威廉斯以年僅18歲零71日，成為歐國盃歷史上，最年輕正選上陣球員。丹麥亦打相同陣式，隊長丹尼爾艾格領導一條防線抵擋對手強攻。
高恩達利勁射奠勝
荷蘭實力勝一籌，甫開賽就大打進攻足球，7分鐘洛賓左路出波，尹佩斯趕到左腳抽射柱邊出界。荷蘭壓完一輪未竟全功，24分鐘首先失波，邦比翼鋒高恩迪利殺入禁區，左路起腳射穿荷蘭門將史基倫堡「大細龍門」，丹麥領先1:0。36分鐘，丹麥門將史提芬安達臣直接將皮球傳交洛賓，後者於禁區頂起腳勁射，可惜中門柱，非常不夠運。43分鐘，史奈達傳交尹佩斯，但後者近門竟射中史提芬安達臣，半場丹麥領先一球。
下半場荷蘭發動強勁攻勢，一落場尹佩斯已接應史奈達傳送抽射，稍後中場雲邦美中距離勁射，都被史提芬安達臣接連化解，阿費利勁射亦柱邊出界。63分鐘洛賓出動「私家頭槌」攻門，可惜又頂斜。其後荷蘭換入亨特拉爾及雲達華治入場搏殺，74分鐘史奈達妙傳，亨特拉爾單刀又射得太正，始終未能破門，最終輸0:1完場。
奧地利賭網針拮荷蘭公仔
92年丹麥勇奪歐國盃，四強曾淘汰荷蘭，今次又爆冷贏波，可謂「橙軍剋星」；而奧地利莊家「bet-at-home」，最近用穿上荷蘭波衫的巫術公仔作宣傳，今次荷蘭首仗即敗，難道是魔咒難逃？