中環出更：青聯靚女搞國學班受歡迎
團體北上搞研習班成風，最近就輪到青聯賢慧社。卓妮日前中午到中環怡和大廈食飯，巧遇香港國學中心主席黃夢瑩（Monin），原來佢約埋青聯賢慧社主席羅詠詩、副主席周沁及林玉茵等好姊妹食飯，密斟上京與清華大學合辦首次國學EMBA班。一眾靚女講起今次報名人數爆晒燈，不知幾開心。
黃夢瑩親自帶隊
Monin話，今次係第一次將國學班搬上北京，為期五日，原定學額係三十個，但估唔到勁受歡迎，報名人數多達八十幾人，連平時唔活躍嘅青聯成員都踴躍報名，最終要篩選到五十六人才能成行，打響漂亮頭炮。Monin親自帶隊北上，名媛阮榮文蔚表妹、賢慧社副主席鄭詩韻亦抽空北上，重溫幾日那些年學生妹生活。
卓妮見Monin帶住件設計別致嘅桃紅色靚衫，上邊印住取自《論語》「仁者樂山，智者樂水」嘅「樂山樂水」。原來件衫係佢精心設計，專供國學中心舉辦活動時穿着。Monin話，男仔件衫就印住《論語》嘅「學而時習之」，絕對唔會同人撞衫喎。