中環出更：張宗豪密斟葉竣棓 打造型男新指標
卓妮最鍾意喺中環閒逛，有日途經威靈頓街嘅名店TCNY時，就見到頂尖西服訂造品牌詩閣（Ascot Chang）嘅太子爺張宗豪（Lincoln）喺度，仲拎住軟尺幫一位後生潮男度身。原來呢位潮男係電器設備供應商明記製造廠老闆葉泰海嘅囝囝葉竣棓（Jason），Jason自創珠寶設計生意，Lincoln正密斟佢為TCNY設計至潮配飾，齊為城中型男扮靚。
TCNY係詩閣旗下嘅年輕品牌，最近由銷售女裝變身為專攻潮男市場，一套訂造西裝價錢約四千八百元至九千元，所以西裝配飾設計都唔可以忽視，所以Lincoln搵來Jason幫手，設計男士襟針、袖口鈕及呔夾等潮流配飾。
Jason孖戒顯個人風格
原來兩人相識於半年前，同為浙江省奉化市政協，由於年紀相若，又同為奉化人，所以好啱傾。
卓妮見Jason右手無名指戴住孖戒，其中一枚條狀鑽戒嘅設計極之特別，係由黑金、白金、玫瑰金及碎鑽砌成，極有自我風格，難怪Lincoln同佢一拍即合喇！
其實Lincoln都好鍾意扮靚，佢話係受到媽媽范元芳感染，梗係啦，佢媽媽經常打扮得一身貴氣Look示人，做仔嘅點都要執正啲唔怕失禮人。
卓妮