立法會漁農界功能界別選情又有新發展，我哋之前講過，人稱「根叔」嘅黃容根搵咗現年三十一歲嘅何俊賢做徒弟跟出跟入，令人聯想何係根叔嘅接班人。消息一出，根叔就同我哋講，聲言自己無徒弟，過去只係同何俊賢合作過，又話最近收到好多業界人士來電，希望熟悉業界嘅佢留任繼續跟進業界問題喎，即係佢好大機會再做多四年議員。
何俊賢過去一段時間經常跟住根叔出出入入，就連候任特首梁振英（CY）落區探訪漁農業界時，何俊賢都可以企喺CY身邊，如果唔係接班人或有叔輩首肯，相信好難企到咁重要嘅位置，亦好難怪外人會以為根叔搵到接班人。
不過，根叔就用區議會選舉「票王」劉國勳做例子，話當年國勳都跟過佢做副發言人，但都無當國勳係徒弟，只係拍檔合作，而事後多年國勳有乜重要事情都有同佢交換意見喎。講到呢度，已經畫公仔畫晒出腸，根叔喺業界挽留下再做四年議員，業界嘅生力軍就要等多四年先有得上位喇。