盛傳獲挽留過渡到「梁朝」新班子嘅民政事務局局長曾德成，尋日同候任特首梁振英（CY）同場出席「千人齊繡清明上河圖」嘅開針禮，期間德成局長疑似冧定新老闆，主動引用CY提出要搞好嘅「橋頭經濟」概念，提醒參加者要注意繡好清明上河圖個條橋，話唔定加到CY嘅印象分都未定。不過，市民嘅印象分就未必加到喇。
CY當選後多次倡議喺新市鎮地域發展「橋頭經濟」，鄰近邊境地區嘅元朗同天水圍可謂潛質優厚，適逢尋日CY同德成局長一齊到天水圍出席活動，「橋頭經濟」呢四個字隨即被連番引用，先係新界社團聯會（新社聯）會長梁志祥提議元朗接壤深圳可以發展「橋頭經濟」，隨後德成局長又再提及，變相令現場好似CY政綱嘅宣傳會咁。
講開新社聯，梁志祥透露今日會率領四十多人代表團訪京四日，預料最快於明日獲港澳辦主任王光亞接見。梁志祥話，佢今次係首次以會長身份率團訪京，但唔係好緊張，笑言只係擔心自己啲普通話到時唔夠用喎！