政情：Eva鄭接老公最後通牒
夕陽政府仲有個多月就收檔，一直盛傳唔會留任嘅運輸及房屋局局長鄭汝樺（Eva）至今仍未肯表態確定去留問題。Eva尋日出席一個電台節目時，被追問係咪劈炮唔撈，佢就欲蓋彌彰話人生去到分岔路口，要睇清楚行邊條路，仲繼續以家人為擋箭牌，聲稱已接到老公發出嘅最後通牒，所以一定要盡快決定去留問題。
Eva話，其實佢之前都回應過，覺得如果再做落去就要做多五年，覺得人生已到分岔口，所以同屋企人傾過，老公亦向佢發出最後通牒，所以要做抉擇，並唔係關乎邊個做下任特首，又或者有無得做司長嘅問題。咁即係留唔留任呢？佢就好風騷話，大家之後就會知佢係咪唔撈喎。
雖然Eva講咗等於無講，但佢不忘吹噓自己嘅政績同撐吓新政府，佢話如果下屆政府想有更好嘅架構，佢都會支持喎。