政情：CY有潛質當美食大使

自言要做「親民特首」嘅CY，當選後多次表明新政府嘅司局長會更多落區同市民接觸，事實上佢自己亦身體力行做好榜樣，當選後一連多日落區向市民謝票，最近亦四出推銷新政府架構重組嘅建議。CY落區嘅同時都要「醫肚」，佢去到邊就食到邊，好似尋日到天水圍出席活動前，就先到元朗錦田嘅有機農場參觀粟米田。

自掏腰包買粟米 顯清廉作風

一身便裝嘅CY到達有機農場後，無懼呢幾日落雨可能令粟米田有泥濘，喺未有換水靴嘅情況下親自落田摘粟米品嘗，之後又飲粟米水，為有機耕作打氣。事後好客嘅農場主人想送一籃有機蔬果畀CY，但清廉嘅CY婉拒農場主人嘅好意，反以一千二百元買咗一百二十條有機粟米搬返屋企。

其實CY落區食嘢多數都係光顧平民化嘅餐廳或街頭美食，好似佢競選時就經常喺座駕內食咖喱魚蛋配元朗白糖糕，當選後又抽時間陪太太食飯撐枱腳，先後到翠華茶餐廳食晚餐，又到過喺大角咀重開嘅老字號「美而廉餐廳」，叫咗鐵板扒餐及蛋白炒飯。另外佢哋又到過筲箕灣東大街晚膳，先後點咗清湯牛腩片頭湯河、淨魚蛋、淨雲吞同油菜等美食。

話時話，以前末代港督任內幫襯泰昌餅家食蛋撻食到街知巷聞，反而回歸後兩任特首老董同煲呔曾落區都無乜代表作，反而CY當選以來走入群眾頗受市民歡迎，而佢周圍試食亦反應良好，食市大可以搵佢幫襯時相片貼出嚟做生招牌，所以話佢可以成為特首級嘅香港美食大使就係咁解喇。