政情：長毛貼大字報 勢被追數
上個禮拜五立法會續會，工聯會王國興將幾張用毛筆寫嘅大字報貼喺會議廳外、主席曾鈺成嘅畫像隔籬。社民連議員梁國雄（長毛）見大字報貼咗幾個鐘都未畀人撕走，於是就有樣學樣，貼上一班網民惡搞建制派嘅二次創作，最後要勞煩清潔工人幫佢逐張逐張搣番落嚟。
即將退休嘅立法會秘書長吳文華（Pauline）話可能會問長毛追收清潔費，佢又透露長毛之前喺會議廳入面放氣球，秘書處都收咗佢一千蚊氣球清潔費。
幾個月前，長毛趁財爺喺會議廳宣讀預算案嘅時候，將一個寫住「全民退休保障」嘅橙色大氣球緩緩放上半空。Pauline憶述，長毛個氣球當時卡咗喺圓形天花板嘅中間，秘書處一度為點樣攞番個氣球落嚟而費煞思量，最後佢哋決定搵清潔公司幫手收拾殘局。
Pauline又話，秘書處之後基於「用者自付」嘅原則，向長毛收取一千蚊嘅清潔費。上次個大氣球使咗長毛成千蚊，唔知今次秘書處又要佢賠幾多錢呢？