中環出更：二胡王子 幼年拉鐵罐學藝
著名二胡大師王國潼及「二胡王子」王憓（Ray）呢對父子檔，為紀念一代宗師劉天華逝世八十周年，將於月尾及下月初分別舉行二胡示範講座及演奏會。王國潼話，來港廿幾年，發覺唔少港人都愛聽二胡，兩父子於是落力推廣二胡普及化。
加入R&B元素年輕化
王國潼笑稱，二胡予人嘅形象低俗，好似街頭賣藝，不過近期日本、新加坡、台灣等地掀起二胡風，唔少年輕人爭住學，好似Ray任職理事長嘅二胡藝術中心，大部分學員竟然係日本小孩。二胡雖得唔少人喜愛，但由於難以掌握拉奏技巧，故有人捨難取易，學習古箏同笛。Ray有見及此，年前重新編寫二胡入門教材，讓學員更易上手。Ray仲將傳統音樂加入R&B元素，吸引更多年輕人玩添。
王國潼話，學二胡必須坐定定，少啲耐性同毅力都唔得，所以一定要每天早午晚練習。而盡得爸爸真傳嘅Ray，兩歲半起就用鐵罐當二胡拉，五歲正式學習至今。Ray原來都已經四十歲，係咪音樂令佢常保青春呢？