林瑞麟告別政壇，將偕太太在本屆政府任期完結後，遠赴英國牛津大學進修神學，真係可喜可賀！假假哋民望低都做過九個月政務司司長，現年五十六歲就可優哉扶眷靈修，好多人恨都恨唔到！「誰知將相王侯外，別有優游快活人」，老朽在此恭賀林瑞麟去到人生另一境界。
一個人，到了無求，品自高。「林公公」亦搖身一變，講嘢都充滿自信：做人要知所進退，政治生涯最好自己揀個時間，幾時你認為適合離開，唔好畀時局代你揀幾時離開。
林公仕途無礙，回歸後據云在民主阿婆提攜下，官運如坐火箭，由首長級第三級升至D8，以四十二歲之齡成為最年輕的D8政務官，傳言民主阿婆曾後悔提拔佢喎！民主阿婆不安於室係人都知，在林公表白「今生無悔」時都要抽吓水，自己明明一樣可以「袖手乾坤看日斜」，卻偏不甘寂寞，經常跑出來亂噏廿四，一把年紀依然唔化，依然唔明「命中若有終須有，到底無時不奈何」嘅道理。
林瑞麟今「知所進退」，老朽想佢諗吓：如果保護老鼠比吃老鼠收益更大，並且沒有甚麼風險的話，多數貓都會採取保護老鼠的策略；繼續吃老鼠的貓，當是道德出奇高尚的貓，之不過，如果把滅鼠的希望寄託在這種貓身上，老鼠就會成災。
林公進修神學後，日後如有機會再服務社會，老朽希望佢係一隻高尚的貓，起碼對住貪曾，真正知進退，就唔會維護佢「為港人做咗好多嘢」！