中環出更：王以智反傳統 晚宴禪味十足
前滙豐私人銀行亞洲區行政總裁王以智（Monica）淡出金融界後，搵錢，唔再係人生首位。日前佢以演藝學院拓展委員會主席身份搞籌款晚宴，一反豪華盛宴傳統，Monica一度收起餐枱上所有餐具，只剩下嘉賓名牌，嚇到富貴賓客以為無飯開。
「吊胃口」籌逾九百萬
晚宴上周四喺君悅舉行，逾三百位VIP到賀。主人家大玩原始「RAW」味，華麗宴會廳內，只有鋪上鐵板嘅十多張餐桌。枱上冇杯冇碟冇刀叉，賓客不禁竊竊私語。Monica唔理咁多，安排近六十位精英學生及畢業生載歌載舞，睇騷半粒鐘後，依然無嘢食。
正當賓客暗叫「有冇搞錯」時，驚喜原來在後頭，一身唐裝嘅侍應，逐一為賓客端上鐵盒，睇真啲，原來係精緻美食，有魚、有牛肉，仲有蘋果批同雪糕等。
刻意「吊人胃口」，Monica認為咁至夠「RAW」，就好比演藝學生一樣，未雕琢之前只係頑石，毫不起眼；一旦遇上伯樂提拔，就蛻變明日之星，餐飯嗒落禪味十足。
Monica一出手，一晚輕易籌得九百多萬元。代理多個名錶及珠寶品牌嘅保良總理陳正欣（Daniel），帶頭捐一百萬元。穿針引線嘅，原來係前民政事務局常秘李麗娟細妹李桂蘭，佢話，知道Daniel為善最樂，所以成人之美喎。
卓妮