中環出更:楊貫一企硬用日本靚鮑

自從日本海嘯之後,吉品鮑外銷大幅減少,令到本港靚鮑魚價格係咁升。尋日卓妮喺沙田馬場遇到「阿一鮑魚」富臨飯店老闆楊貫一,佢話飯店為保質素,至今依然堅持沿用日本鮑魚奉客,不過存貨始終有用完嘅一日,佢好憂心咁話,業界將會面臨前所未有嘅威脅。

一哥話,日本鮑魚供不應求,業界惟有引入南非、中東等地嘅雜鮑取代,不過呢啲雜鮑均屬次等,所以佢堅持只用日本靚鮑,唔會供應次貨。喺食材貴、租金貴、人工貴等問題下,一哥都慨嘆飲食業前景好唔樂觀,仲話從來未試過咁艱辛喎。

盼CY關注舖租

一哥又話,候任特首梁振英(CY)仲未會見飲食界,佢好希望見到CY嘅第一時間,向對方反映商舖租金問題,皆因有見銅鑼灣某地舖由月租五十萬,大幅加至百一萬,變相扼殺小商戶嘅經營權。佢期望CY上任之後,好好睇吓租金貴嘅問題,放飲食業一條生路。

卓妮

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報