政情：自由黨散散哋 多人嗌走
特首選舉結束後，建制派各黨可以話係重新大洗牌，其中鼓吹特首選舉中投白票嘅自由黨，隨住唐英年落敗，該黨都震到散散哋，據聞最近爆退黨潮，其中一位正係自由黨常委李應生。除咗佢，黨內更盛傳司庫李子良同創黨成員丁午壽都意興闌珊，打算離開呢個老家。若傳言屬實，對自由黨絕對係一大打擊，令本已重傷嘅自由黨，更難收復工商界失地，相信主席劉健儀會相當頭痕。
自由黨雖然係建制派，但由於喺特首選舉時不理中聯辦勸告，強行投下白票，已令中聯辦憤怒，所以有唔少做緊大陸生意嘅黨員，都想同自由黨劃清界線。
削吸水能力 方剛連任添難
啱啱喺特首選舉後退黨嘅李應生，唔只係前區議員咁簡單，佢係香港中藥業協會理事長，又係著名中藥商「百成堂」話事人，同唔少藥房稔熟，可以話喺批發及零售界有一定交情同影響力，佢退黨好有可能影響現任批發零售界議員方剛能否連任。不過有知情人士話，李應生想好嚟好去，就算退黨，都會繼續幫方剛拉票，唔會就咁一走了之。
但最令自由黨頭痛嘅係，退黨潮似乎未有停低迹象，唔少成員雖然未表明走佬，但已經萌生去意，好似司庫李子良同創黨成員丁午壽等，都傳佢哋有意出走。例如李子良，早前明明講過佢會同成班黨高層一共八人一齊見候任特首梁振英，但偏偏前日見梁時就獨欠咗佢，實在耐人尋味，令佢退黨傳聞甚囂塵上。
現任自由黨司庫嘅李子良，係自由黨大掌櫃，專責幫自由黨周圍籌款，都算係自由黨其中一條大水喉，如果佢走咗，對自由黨嘅吸水能力有好大影響。但我哋到目前為止，都聯絡唔到李子良，未得到佢回應。
至於丁午壽，一早已經唔再活躍黨內活動，近年只係掛名做黨員，不過據聞佢都私下同過其他黨友呻，話如果自由黨講啲嘢太過偏向基層，佢都好難同班商界交代，所以都有諗過退黨，但由於佢係自由黨創黨成員，黨內資歷極深，所以黨榮譽主席田北俊都有挽留佢，或者有彎轉。加埋早前我哋寫過香港進出口汽車商會會長羅少雄（Paul）有意過檔經濟動力，呢個黨真係散散哋。