政情:周一鑊死撐 拒認跪低

候任特首梁振英(CY)日前果斷截停明年私家醫院雙非孕婦分娩配額,一直剛愎自用、後知後覺嘅食物及衞生局局長周一嶽(周一鑊)隨即「跪低」,暫停同私院商討明年「雙非」配額。周一鑊一直只顧雙非孕婦而漠視本地及單非孕婦,如今CY一出聲截龍,佢就立即 配合,尋日仲死撐自己「膝頭做過手術」為由,拒認「跪低」,認真無恥。如果膝頭有事,不如以腳痛理由早啲落台好過啦!

周一鑊尋日喺電台節目上認叻話,佢兩星期前已經主動同CY討論雙非孕婦配額問題,又透露同私院商討時,已經表明下屆政府有自己做法,認為私院應該對「零配額」有心理準備,又話早啲公布係好事,可以等私院有時間準備轉型喎,講到尾都係想讚自己對「零配額」有功啫!

CY競選特首之時,早就主打解決「雙非」孕婦問題,已經講咗好多個月,稍為留意吓新聞都知道,但偏偏周一鑊就乜都唔知,上星期仲繼續同私院商討明年「雙非」配額,傳出明年配額由三萬個減到二萬多個,如果周一鑊話兩星期前已經同CY傾過,咁到底佢有無用耳仔聽嘢呢?抑或見CY時不停諗住自己有無得留任呢?

立場幾日內大轉變

周一鑊做錯嘢已經唔係新鮮事,每次出事後都堅持「死不認錯、永不改過」,佢喺「雙非」問題上明明衰咗,但佢尋日仍然死撐話唔係因為CY嘅決定而「跪低」,仲扮晒幽默話:「自己膝頭哥做過手術,唔係咁容易跪低」,當局一定會執行「零配額」嘅決定。立場幾日內大轉變,呢啲唔係跪低,又係乜呢?唔通周一鑊想人哋讚佢「從善如流」或「成功爭取零雙非」?

夕陽政府早就Hea住等收工,庸碌無能嘅局長就算依家走人,其實都唔會影響日常運作,既然周一鑊話自己膝頭有事唔可以跪低,倒不如以腳痛理由提早落台,一來避免繼續浪費納稅人金錢,二來總好過換屆時被人攆走吖!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報