封健體園地 長者唔開心
健康園地被康樂文化事務署長時間圍封，長者「有得睇、冇得玩」！林婆婆不時到大圍積富街長者健康園地做運動，惟去年年底已發現上述公園被圍封，卻未有張貼任何告示，「場地設施都冇事，無啦啦圍住晒唔畀人玩，康文署想點呀？」
康文署發言人表示，上址共設三套長者健體設施，去年十二月八日接獲市民意見，指園地附近一棵欖樹出現蛾蟲，遂在上址進行滅蟲工作。此外，當蛾蟲接觸農藥後會跌至在長者健體園地，基於公眾安全為由，遂將其中兩套受影響的長者健體設施暫停開放。
「但係我仲成日見到有工人帶啲小朋友入去玩，即係康文署冇好好保護市民喇！」林婆婆指上址之康體設施雖然被圍封，但市民仍可進場，促康文署予以檢討。