笑看天下:做好本分 唔好吹水

溫總向梁振英頒任命狀後,形容任命書「是一副沉甸甸的責任」,尤其在廉潔和團結各界上更耳提面命。

梁振英未來五年的行政長官工作,因要接煲呔曾官商勾結醜聞的爛攤子,梳理好香港「深層次矛盾」,真真正正是「任重道遠」!

煲呔曾一味吹水,然而天下豈有吹不破的牛皮?喺佢吹水下,香港窮人愈來愈多,基層生活未見改善,貧富懸殊愈拉愈闊,搞到社會怨氣大增,要「大和解大團結」,唔係嗌吓口號就掂!梁振英要港人「齊心」,今後施政真係要落區多聽取民意,千祈千祈唔好學煲呔曾一味得把口「福為民開」,實情掛住自己「貪遍省港澳,歎盡海陸空」。

要發展經濟、改善民生,唔係口出狂言雷語,好似煲呔曾話「香港金融業可養活一千萬人」。魯迅就講得啱嘞:「一要生存,二要溫飽,三要發展。有敢來阻礙這三事者,無論是誰,我們都反抗他,撲滅他!」魯迅是食人間煙火的,他不會提倡「毫不利己、專門利人」的「雷鋒精神」,他的三項要求平易近人,一個人能生存——溫飽——發展,那首先做好自己,為自己活,活得好,有了發展,再推己及人,這其實已是「賢人」的境界,聖人的「先人後己」畢竟可遇不可求。

想深一層,如果人人盡本分做好份工,社會必和諧進步。梁振英要「穩中求變,適度有為」,適度,老朽的理解就是人人做好本分,唔好吹水!