特首選舉後，唐營勢力已被迫「歸邊」撐梁振英（CY），就算心有不甘都唔敢做到咁出面。好似唐英年「家臣」林大輝咁，佢喺自己最新一期立法會議員通訊中，似乎對CY嘅態度有所軟化，好似佢提到自己支持成立調查委員會查CY，係因為政府選擇性放料，令市民唔清楚真相。就咁將個波推落政府度，似為幫CY講好說話，莫非佢都軟化跟大隊歸邊？
不過，留心啲睇份議員通訊，就發現有弦外之音，因為成份通訊內，雖然落咗兩張有CY嘅相片，但相中嘅CY唔係影到頭耷耷，就係鬼咁細張，要用放大鏡至睇到。相反唐唐嘅相片就有四張咁多，而且張張都大頭，笑容滿面。
睇嚟大輝表面要繼續挺唐之餘，亦唔敢得失CY，但勉強奉承CY之同時，又要加添幾分避忌，所以話做兩面人確係好艱難。